“Динза” комиксын товч агуулга:

Энэ хөгжилтэй түүх бяцхан хөвгүүн үлэг гүрвэлийн өндөг олсноос эхэлдэг юм. Бяцхан хүү дэлхий дээрх цор ганц амьд үлэг гүрвэл найзаа Динза гэж нэрлэх бөгөөд тэд хамтдаа энэ цаг үеийн хүн төрөлхтөнд тулгарсан хүнд хэцүү сорилтыг даван туулахын тулд цаг хугацаагаар аялан мянганыг туулж муу сүнснүүдийг сөрөн зогсох болно. Цаг хугацаа орон зайгаар аялж хамгийн тэмдэглэлт  онцгой цаг үеүд, онцгой хүмүүс, түүхэн баатруудтай учирснаар эр зориг ухаан мэдлэг туршлага олж авдаг хоёр найз болон хар хүчний биежсэн эрчим хүч болсон муу сүнснүүдийн тулаанд хэн нь ялагч болох бол? Тэдний тэмцлийг шимтэн сонирхсон уншигчид олон арван цувралыг хэдхэн хоромд л уншиж дараа дараагийн үйл явдлуудыг тэсэн ядан хүлээдэг билээ. Динза комик нь хүн төрөлхтөн, улс орнууд, дэлхий ертөнцийн түүх, шинжлэх ухааны гайхамшигт нууцуудыг хүүхэд, эцэг эхчүүдэд уран сэтгэмжээр өгүүлсэн баатарлаг адал явдлуудаар дүүрэн сургамжит сэтгэл татам түүх юм. Технологийн хөлгүй их шуурган дахь ухаалаг утас, пад, компьютер, телевизор зэрэг хүйтэн дата болох дэлгэцийн эзлэн түрэмгийллээс хүүхдээ аварч чадахгүйд хүрч аргаа барсан эцэг эхчүүд хүүхдээ Динза комикстой найзлуулсан мөчөөс эхлэн өнгөт комикоо дахин дахин уншиж үйл явдалд нь амтшихын гайхамшигийг дуу нэгтэйгээр хүлээн зөвшөөрдөг билээ.

“Динза” комикс номны амжилтууд:

• “National Geographic” нийгэмлэгийн байгаль хамгаалагч, шинжлэх ухаанч дүрээр албан ёсоор сонгогдсон баатрууд
• “Dream” хүүхдийн телевизийн эцэг эх хүүхдүүдийн дунд шалгаруулсан “ Kids choice” уралдаанд Шилдэг хүүхдийн зохиолоор шалгарсан бүтээл
• SBN телевизийн хүүхдийн Нахиа хөтөлбөрөөс шалгаруулсан хүүхдийн шилдэг номоор  шалгарсан ном
• 2009-2015 оны хугацаанд 1,1 сая хувь борлогдож Монголын хэвлэмэл бүтээгдэхүүний рекордыг тогтоосон бэстселлер ном
• Цэцэрлэг, ерөнхий боловсролын бага ангийн сурган хүмүүжүүлэгчдийн зүгээс Монголын түүх, Монгол хүний үнэ цэнэ, мөн чанар, гэр бүлийн үнэ цэнэ, нөхөрлөл, үнэнч шударга тууштай зан төлвийн үлгэр дуурайлал, юу сайн юу мууг ялгах ёс суртахууны суурь тулгуур ойлголт, өөрийгөө танин мэдэх, амьдралын зорилго тэмүүллийн утга учир, эр зориг, мэргэн ухааны үнэ цэнэ зэрэг чухал агуулгыг бага насны хүүхдийн сэтгэхүйн онцлогт өндөр түвшинд тааруулан бүтээж чадсан боловсролын шилдэг агуулгатай номоор үнэлэгдсэн бүтээл
• Эцэг эхчүүд, багш нарын санал нэгтэй дүгнэлтээр эцэг эх багш нартайгаа хамтран уншиж ярилцах дуртай ном
• Хүүхэд анхлан уншиж сурахад болон ном унших дадал суухад хамгийн үр дүнтэйгээр тусалсан номоор шалгарсан

“Монголын сэтгэл зүйн хүрээлэн”-гээс хүүхдийн сэтгэл зүй, сэтгэлийн боловсролд ашиглагдах шилдэг агуулгаар үнэлэгдсэн бүтээл